Héichpunkte vun dem 7. interdisziplinäre Forum iwwer digital Inklusioun

Ënnert dem Patronat vun der lëtzebuergescher Presidence vun der Benelux-Unioun huet de Ministère fir Digitaliséierung den 18. November am Hémicycle vum European Convention Center Luxembourg déi 7. Editioun vum interdisziplinäre Forum iwwer digital Inklusioun organiséiert.

D’Veranstaltung huet ronn 100 Vertrieder vu Verbänn an Organisatiounen, déi sech fir digital Inklusioun engagéieren, souwéi Experten an Delegéiert aus deenen dräi Benelux-Memberstaaten zesummebruecht. D’Diskussiounen hunn sech op zwee strategesch Theme fir d’Benelux-Regioun konzentréiert: d’Bekämpfung vun Desinformatioun an d’Ëmsetzung vun den Ziler vun der Digital Decade vun der Europäescher Unioun bis 2030.

De Forum huet mat enger akademescher Keynote vum Professer Dr. Gabriele Lenzini, Fuerscher um Interdisciplinary Centre for Security, Reliability and Trust (SnT) vun der Uni.lu ugefaangen, deen eng detailléiert Analys vun de Mechanismen iwwer d‘Verbreedung vu Falschinformatioun a Strategien fir hir Bekämpfung presentéiert huet.

No dëser Keynote huet eng Podiumsdiskussioun mat Vertrieder vun den dräi Benelux-Länner stattfonnt: Dr. Debora Plein (BEE SECURE – Lëtzebuerg), Claire Gersen (Ministerie van Binnenlandse Zaken en Koninkrijksrelaties – Holland) an Alexander Hoefmans (Féderalen ëffentleche Service Wirtschaft – Belsch) hu sech iwwer national Approchen fir d‘Bekämpfe vun Desinformatioun ausgetosch.

D’Evenement ass mat Presentatiounen iwwer d‘Ziler vun der Digital Decade weidergaangen. D’Vertrieder vun den dräi Staaten : Stéphanie Silvestri (Service fir Medien, Connectivitéit an digital Politik – Lëtzebuerg), Wessel van Twist (Ministerie van Binnenlandse Zaken en Koninkrijksrelaties – Holland) an Alexander Hoefmans (Féderalen ëffentleche Service Wirtschaft – Belsch) hunn hir jeeweileg Approchen fir d‘Ambitioune vun der Europäescher Kommissioun bis 2030 ze erreechen, virgestallt.

De Jean-Claude Meyer, stellvertriedende Generalsekretär vun der Benelux-Unioun, huet d’entscheedend Bedeitung vun der grenziwwerschreidender Zesummenaarbecht bei der Bewältegung vun digitalen a gesellschaftlechen Erausfuerderungen ënnerstrach an drun erënnert, datt d’Benelux-Regioun als Labo fir regional Integratioun an als dreiwend Kraaft fir Innovatioun gëllt.

D‘Stéphanie Obertin, Minister fir Digitaliséierung, huet hirersäits de Wëlle vu Lëtzebuerg bestätegt, eng sécher, inklusiv an innovativ digital Zukunft ze gestalten. Zousätzlech huet si déi bevirstoend Publikatioun vum zweeten Nationalen Aktiounsplang fir digital Inklusioun ugekënnegt.

Dës Bäiträg hunn en Dag voll mat Austauscher ofgeschloss an d’Determinatioun vun den dräi Länner confirméiert, zesummen um Erreechen vun hire gemeinsamen Ziler ze schaffen an d’Positioun vun der Benelux-Regioun als Schlësselakteur vun der grenziwwerschreidender Zesummenaarbecht weider ze stäerken.