Stéphanie Obertin huet de neien Nationalen Aktiounsplang fir digital Inklusioun presentéiert

De 4. Februar 2026 huet d‘Stéphanie Obertin, Ministesch fir Digitaliséierung, de zweeten Nationalen Aktiounsplang fir digital Inklusioun (2026–2030) presentéiert, dee vum Regierungsrot de 16. Januar 2026 ugeholl gouf.

"Dëse neien Aktiounsplang, entwéckelt a Consultatioun mat méi wéi 30 Acteuren aus dem ëffentlechen, privaten an dem zivilgesellschaftleche Beräich, consolidéiert bestoend Moossnamen a zielt dorop of, besser op d'Bedierfnesser vun de vulnerabelsten Bevëlkerungsgruppen anzegoen an ze garantéieren, datt den digitale Wandel der ganzer Bevëlkerung ze gutt kënnt. Mir wëlle keen am Stach loossen." huet d‘Stéphanie Obertin ënnerstrach.

Sechs strategesch Usäz fir eng nohalteg digital Inklusioun

Den zweeten nationalen Aktiounsplang fir digital Inklusioun baséiert op sechs strategeschen Usäz. Dës enthale 36 Ziler an 249 Initiativen, déi vu 14 Ministèren ëmgesat ginn.65 Initiativen faalen direkt ënnert d‘Verantwortung vum Ministère fir Digitaliséierung.

• D’Koordinatioun vum nationalen Aktiounsplang sécherstellen
• Digital Kompetenze verdéiwen
• D’Motivatioun stäerken an dat digitaalt Vertraue fërderen
• Den Zougang zum Digitalen erliichteren
• D‘Autonomie duerch digital Technologie stäerken
• Eng Alternativ zum Digitalen erhalen

Suivi an Evaluatioun

Den Aktiounsplang ass dynamesch a wäert engem riguréise Suivi an enger kontinuéierlecher Evaluatioun ënnerleien, baséiert op Indicateuren a Livrablen, déi fir all Initiativ definéiert goufen.

E Pilotagecomité, deen déi bedeelegte Ministèren a Verwaltungen zesummebréngt, wäert de Suivi an d’strategesch Kohärenz vun den Aktiounen assuréieren. Parallel dozou koordinéiert de Ministère fir Digitaliséierung eng interministeriell Aarbechtsgrupp, déi sech reegelméisseg trefft, fir sech iwwer d’Thematik zu Lëtzebuerg auszetauschen.

Zousätzlech gëtt eng extern Evaluatioun vun engem spezialiséierten externen Expert duerchgefouert, mat engem Tëscherapport no der Hallschent an engem Ofschlossrapport no fënnef Joer, fir den allgemengen Impakt ze moossen a Recommandatioune fir zukünfteg politesch Moossnamen ze formuléieren.

De kompletten Aktiounsplang an seng Initiative kënnen hei an der zoustänneger Rubrik consultéiert ginn.

Quell: Offiziell Kommunikatioun vum Ministère fir Digitaliséierung, www.digitalisation.lu