D'Motivatioun an d'digitaalt Vertraue steigeren

Ausschaffen, duerch de Ministère fir Digitaliséierung, vum Internetportal zesummendigital.lu, dat der digitaler Inklusioun gewidmet ass. Dëst Portal wäert nëtzlech Informatiounen iwwer d'Acteuren aus dem Beräich vun der digitaler Inklusioun an déi besteeënd Offeren an och Informatiouns-, Sensibiliséierungs- a Selbsthëllefspublikatiounen a -ressourcen, déi d'digital Inklusioun fërderen, regruppéieren. D'Zil ass, de besteeënden Offeren eng maximal Visibilitéit ze ginn, d'Ressourcen ze promovéieren a se der Ëffentlechkeet zur Verfügung ze stellen.

Animéieren, duerch de Ministère fir Digitaliséierung, vun engem interdisziplinäre Forum, dee ministeriell Departementer, Representantë vun den Acteuren, déi am Beräich vun der digitaler Inklusioun aktiv sinn, an den Acteuren, déi sech ëm Persoune këmmeren, déi net an der digitaler Welt doheem sinn, zesummeféiert.

Organisatioun, duerch de Ministère fir Digitaliséierung, vun engem Dag, deen der digitaler Inklusioun gewidmet ass ‒ de 17. Mee ‒, dëst am Kader vum Weltdag vun der Telekommunikatioun an der Informatiounsgesellschaft. D'Zil ass, méi Visibilitéit vun den Acteuren an de besteeënden Initiativen zu Lëtzebuerg am Zesummenhang mat der digitaler Inklusioun ze schafen.

Aféierung, duerch de Ministère fir Digitaliséierung, vun engem järlechen Opruff fir Kandidature fir d'Finanzéierung vu Pilotprojeten, déi d'digital Inklusioun fërderen.

Sich no verschiddene Collaboratiounen tëschent dem Ministère fir Digitaliséierung an dem Syvicol, fir d'digital Inklusioun op kommunalem Niveau ze promovéieren. D'Zil ass, d'digital Inklusioun op lokalem Niveau ze fërderen an ze ënnerstëtzen, an de regionalen Ënnerscheeder a puncto Offer, déi wärend den Enquêten iwwer den État des lieux vun der digitaler Inklusioun zu Lëtzebuerg festgestallt goufen, entgéintzewierken.

Kreatioun, duerch de Ministère fir Digitaliséierung, vun enger Rei vu pedagogesche Videoen iwwer déi nei Technologien an d’Benotze vun den digitalen Technologië wéi och hir positiv Auswierkung op d'Bierger an d'Gesellschaft. Dës Videoe sollen hëllefen, d'Sensibiliséierung vun der Ëffentlechkeet fir d'Opportunitéiten, déi d'Digitaliséierung bitt, ze ënnerstëtzen.

Aféierung, duerch de Ministère fir Digitaliséierung, vun enger Etüd iwwer d'Auswierkung vun de rezenten digitalen Evolutiounen op déi Deeler vun der Bevëlkerung, déi net an der digitaler Welt doheem sinn.

Schafe vum Portal "Cybersecurity Luxembourg"duerch den Héije Kommissariat fir national Sécherheet, Luxinnovation a SECURITYMADEIN.LU, dat déi ëffentlech a privat lëtzebuergesch Acteuren, déi sech mat der Cybersécherheet beschäftegen, regruppéiert. D'Portal host ënner anerem Sensibiliséierungs- an Informatiounsinitiative wéi den "Europäesche Mount fir d’Cybersécherheet" an d’"Cybersecurity Week Luxembourg".

Kontinuéierlech Sensibiliséierung vun der Ëffentlechkeet fir eng responsabel Benotzung vun den neien Informatiouns- a Kommunikatiounstechnologien duerch Sensibiliséierungscampagnen a Ressourcen iwwer d'Online-Sécherheet, d'Online-Verhalen an d’Benotze vun den digitalen Technologien duerch BEE SECURE, ënner der Tutelle vum Ministère fir Educatioun, Kanner a Jugend. Déi national Campagnë vu BEE SECURE erweideren d'Kenntnisser vun de Bierger iwwer eng sécher Benotzung vun den digitalen Technologien, entwéckelen déi digital Biergerschaft a steigeren esou d'Vertraue vun de Bierger an déi digital Welt.

Ëmsetzung vun Informatiounscampagnen oder -sitte wéi spambee.lu a secure-iot.lu duerch SECURITYMADEIN.LU, der Agence de Cybersécurité pour les Communes et l’Économie luxembourgeoise, ënner der Tutelle vum Wirtschaftsministère, an Zesummenaarbecht mat der Nationaler Kommissioun fir den Dateschutz (CNPD) a BEE SECURE. "Spambee" ass eng Applikatioun, mat där potenziell geféierlech Spam-E-Mailen a -sitten analyséiert an denoncéiert kënne ginn. De Site "Secure internet of things" informéiert iwwer déi potenziell Gefore vun de Géigestänn, déi mam Internet verbonne sinn, a bitt Rotschléi fir eng méi sécher Benotzung.

Verstäerkung vun der Kommunikatioun iwwer d'BEE SECURE Stopline an Helpline, fir se der Ëffentlechkeet zu Lëtzebuerg méi no ze bréngen. De Service BEE SECURE Helpline bitt eng gratis, anonym a vertraulech Consultatioun iwwer d'Online-Sécherheet an eng responsabel Benotzung vun den digitalen Technologien. Dës Consultatioun riicht sech ënner anerem u Persoune mat Behënnerung. Mam Service Stopline stellt BEE SECURE online e Formulaire zur Verfügung, mat deem spezifesch illegal Inhalter, déi engem am Internet begéinen, anonym a vertraulech signaléiert kënne ginn.